Steve Keating

Ymunodd Steve Keating â Phartneriaethau Lleol fel Cyfarwyddwr yn y tîm Hinsawdd ym mis Ionawr 2024.

I ddechrau, byddai Steve yn gweithio ar Ynni Cymru, prosiect a gytunwyd fel rhan o’r Cytundeb Cydweithio rhwng Llywodraeth Cymru a Phlaid Cymru. Mae Steve yn cefnogi ac yn ehangu cynhyrchu ynni adnewyddadwy mewn perchnogaeth gymunedol ledled Cymru, gyda’r nod o ddefnyddio ynni a gynhyrchir yn lleol mewn ffordd glyfar ac effeithiol i gefnogi uchelgeisiau sero net a sicrhau bod y buddion yn cael eu cadw o fewn cymunedau.

Cyn ymuno â Phartneriaethau Lleol, mwynhaodd Steve yrfa yng Nghyngor Sir Penfro. Yn gyntaf fel syrfëwr meintiau, gan gyflawni prosiectau cyfalaf adeiladu mawr a pheirianneg fecanyddol a thrydanol ar draws y sectorau addysg, hamdden a gofal cymdeithasol.

Dros yr 20 mlynedd diwethaf, mae Steve wedi arbenigo mewn rhaglenni rheoli ynni/carbon a datblygu cynaliadwy, ac wedi cydlynu’r gwaith o greu cynllun gweithredu sero net y cyngor.

Yn ddiweddar, gweithredodd Steve fel arweinydd prosiect Milford Haven: Energy Kingdom (MH:EK), a ariannwyd gan Innovate UK drwy’r rhaglen Prospering from the Energy Revolution, gan fapio’r potensial ar gyfer System Ynni Leol Glyfar (SLES) sy’n seiliedig ar drydan adnewyddadwy a hydrogen gwyrdd.

Gan ddatblygu uchelgeisiau rhanbarthol i ddatgarboneiddio systemau diwydiannol, gwresogi, trafnidiaeth a thrydan, roedd Steve yn gynrychiolydd arweiniol y cyngor ar brosiect map ffordd datgarboneiddio Clwstwr Diwydiannol De Cymru (SWIC) ac roedd yn cydweithio ag arbenigwyr o’r sectorau cyhoeddus, preifat, cyfleustodau a’r trydydd sector.

Steve oedd prif gynrychiolydd y cyngor wrth lunio Strategaeth Ynni Ranbarthol De-orllewin Cymru a Chynllun Ynni Ardal Leol Sir Benfro (LAEP), sy’n nodi’r map ffordd ar gyfer datgarboneiddio Sir Benfro a’r rhanbarth erbyn 2050.

Bu Steve yn rheoli’r prosiect o gyflwyno pum cam ar wahân o bwyntiau gwefru cerbydau trydan (EV) mewn meysydd parcio a depos y cyngor, gan greu rhwydwaith o dros 200 o wefrwyr Cyflym a 28 o wefrwyr Cyflym Iawn ar draws 38 o hybiau yn Sir Benfro.

Roedd yn gynrychiolydd y cyngor wrth ddatblygu Strategaeth Addasu i Newid Hinsawdd Sir Benfro, dan arweiniad y Bwrdd Gwasanaethau Cyhoeddus.

Roedd Steve yn rhan o’r sgwrs genedlaethol a arweiniodd at greu Deddf Llesiant Cenedlaethau’r Dyfodol (Cymru). Mae’n gyn-Gadeirydd Grŵp Ynni Consortiwm Awdurdodau Lleol Cymru (CLAW) ac mae’n Ymgynghorydd Carbon Isel a Gwerthuswr Ynni Carbon Isel cymwysedig CIBSE.